Indre Mongolia

Indre Mongolia
内蒙古
autonom region
Land	Folkerepublikken Kina
Hovudstad	Hohhot
Areal	1 181 104 km²
Folketal	24 049 155 (1. november 2020)
Indre Mongolia 44°N 113°E / 44; 113
Kart over Indre Mongolia i Kina. Kart over Indre Mongolia i Kina.
Wikimedia Commons: Inner Mongolia

Indre Mongolia er ein autonom region i Folkerepublikken Kina.

Geografi

Indre Mongolia grensar i nord til republikken Mongolia og Russland, i sør til provinsane Hebei, Shanxi, Shaanxi, Ningxia og Gansu og i aust til Liaoning, Jilin og Heilongjiang. Provinsen dekkjer 12 % av arealet til Kina, men berre 2 % av innbyggjarane bur der. Regionen er med andre ord ein av dei mest grisgrendte områda i Kina. Størstedelen av området ligg på mellom 1000 og 1500 moh., og store delar av Gobiørkenen ligg i Indre Mongolia.

Innbyggjarar

Folketalet består i 80 % hankinesarar, 17 % mongolar og minoritetsgruppene mandsjuar (2 %), huikinesarar (0,9 %), daur (0,3 %), evenkar, oroqin og koreanarar. Regionen har status som nasjonalt minoritetsområde for mongolane. Opphavleg var dei nomadefolk, men dei fleste er bufaste no til dags. Om lag 350 000 driv framleis med gjeting av buskap. Størstedelen av innbyggjarane er busette på Hetao-sletta langs Huang He og sideelvane og på Khorcinsletta. Dei største byane er industribyen Baotou og hovudstaden Hohhot. Berre 5 % av arealet i regionen er dyrka mark; dette har sjølvsagt med det barske klimaet å gjera.

Historie

Området vart politisk sameint med Kina då den mongolske hæren erobra Kina på 1200-talet. Seinare, då Ytre Mongolia vart liggjande inneklemt mellom interessene til Kina og Russland, blei Indre Mongolia verande under kinesisk innverknad. I 1947 oppretta dei kinesiske kommunistane Indre Mongolia som autonom region. I moderne tid har det vorte danna separatistrørsler i det mongolske folket i regionen.

Administrative einingar

Prefektura i Indre Mongolia.

Sletteland i Indre Mongolia.

Indre Mongolia er delt inn i 12 prefektureiningar:

1. Alxa
2. Bayan Nur
3. Wuhai
4. Ordos
5. Baotou
6. Hohhot
7. Ulanqab
8. Xilin Gol
9. Chifeng
10. Tongliao
11. Hinggan
12. Hulunbuir

Desse er inndelte i 102 ulike typar fylke, som igjen er inndelte i 1425 ulike typar kommunar.

Kjelder

• «Indre Mongolia» av Cato Næverdal i Store norske leksikon, snl.no.
• Denne artikkelen bygger på «Indre Mongolia» frå Wikipedia på bokmål, den 26. mars 2011.

Bakgrunnsstoff

Commons har multimedium som gjeld: Indre Mongolia

• Offisiell nettstad